Ngrihet procedurë gjyqësore ndaj kreut të Strugës për Komand

Ngrihet procedurë gjyqësore ndaj kreut të Strugës

Për shkak të mosrespektimit të vendimit për ndalimin e punimeve rreth postamentit të përmendores së Nuri Mazarit - Komandant Struga, kryetari i Strugës, Ramiz Merko, nga organet gjyqësore vendore, akuzohet për vepër penale



MEHMET LATIFI

Strugë, 28 shkurt - Politizohet dhe problematizohet edhe më shumë ndërtimi përmendores së Nuri Mazarit-Komandant Struga.

Për shkak të mosrespektimit të vendimit për ndërprerjen e punimeve, në rregullimin e postamentit të përmendores së Nuri Mazarit, ndaj kryetarit të Komunës së Strugës është ngritur procedurë penale nga ana e organeve të prokurorisë dhe Gjykatës Themelore në Strugë.


Në bazë të procedimit të organeve të Prokurorisë Themelore, e përfaqësuar nga zëvendësprokurorja Fikrije Bekteshi, Gjykata Themelore në Strugë, përmes gjykatësit hetues Zijadin Islami, ka ngritur kallëzim penal kundër Ramiz Merkos, kryetar i Komunës së Strugës. Tani çështja i është kaluar Prokurorisë Themelore, për shkak të dyshimit të mosrespektimit të Vendimit të Gjykatës, sipas nenit 377, alineja 5 e Kodit Penal të Maqedonisë, për ndalimin e punimeve në postamentin e përmendores së Nuri Mazarit.

Ndaj kësaj aktpadie penale është parashtruar ankesa përmes avokatit Idriz Ziba, e cila nga ana e Trupit Gjykues të Gjykatës Themelore, drejtuar nga Adi Useini, është hedhur poshtë dhe mbetet në fuqi aktpadia penale kundër kryetarit të Komunës së Strugës.

Lidhur me këtë aktakuzë Merko tha se është për t'u habitur që për përmendoren e Nuri Mazarit akuzohet dhe ndëshkohet nga shqiptarët. "Unë nuk ndërtoj përmendore, por ky është vendim i sjellë nga Këshilli i Komunës së Strugës, që më 10 tetor të vitit 2005. Kjo është edhe një dëshmi e trysnisë që bën pushteti qendror edhe përmes organeve gjyqësore, ndaj Komunës së Strugës dhe ndaj meje personalisht", tha Merko.

Përmendorja e Nuri Mazarit, që ka filluar të ndërtohet në bazë të vendimit të Këshillit të Strugës, ka qenë temë polemizuese me polarizime të shumta, deri te ndërhyrja e organeve gjyqësore dhe atyre intermediatare. "Të ndërpriten punimet", ishte një urdhër i prerë, drejtuar punëtorëve në ndërtimin e postamentit të përmendores së Nuri Mazarit nga ana e zëvendëses së Avokatit publik, Zoja Lega, dhe organeve gjyqësore, që gjatë festive të një majit të vitit të kaluar. Kohë më parë, vërejtje kishte bërë edhe eurokomisari Erwan Fouere, gjatë vizitës që i bëri Strugës, në fund të prillit.

Sa i përket ndalesës së punimeve, që është kërkuar nga organet gjyqësore dhe nga Avokati publik, asokohe, Ramiz Merko është shprehur se vizita e tyre në vendin e punimeve, duke anashkaluar organet e komunës së Strugës, nuk shpreh gatishmërinë për bashkëpunim dhe bashkëveprim drejt zgjidhjes së çështjes, që pa nevojë dhe pa asnjë arsye problematizohet. Kryearkitekti i komunës, Urim Hani, në këtë kontekst ka deklaruar se, vendimi i sjellë në seancën e Këshillit më 10 tetor 2005, ngërthen në vete edhe rregullimin e çështjes së lokacionit dhe realizimit të vendimit të sjellë. Hani tha se nuk sheh ndonjë pengesë ligjore ose administrative për ndalimin e punimeve. Epilogu i kësaj aktpadie do të vazhdojë në Gjykatën Themelore në Strugë, që ka nxitur edhe reagime të shumta.


Mars,2007