Nxënësit sot kthehen në mësim..

Greva e arsimtarëve në mbrëmjen e se Martës mbaroi pasi Ministria e arsimit dhe SASHK u morrën vesh për plotësimin e kërkesave të Sindikatës, vendime për mësuesit, 3.200 denarë për ushqim, ndërsa rrogat do të rriten prej vitit 2010.

Nxënësit sot kthehen sërish nëpër shkolla. Greva e arsimtarëve, e cila zgjati tetë ditë, sot mbaroi. SASHK dhe Ministria e arsimit, pas katër orë bisedimesh, arritën marrëveshje për kërkesat e Sindikatës së arsimit, shkencës dhe kulturës.
Ministri i Arsimit Pero Stojanovski dhe kryetari i SASHK-ut Dojçin Cvetanovski firmosën marrëveshjet kolektive për arsimin fillorë dhe të mesëm, të cilat do të hynë në fuqi menjëherë, me përjashtim të rritjes së rrogave, të cilat do të rriten prej 1 janarit të vitit 2010. Prej marsit të vitit të ardhshëm të gjithë të punësuarit me kohë të caktuar do të pranohen në marrëdhënie të rregulltë pune, ndërsa prej qershorit arsimtarët do të marrin nga 3.200 denarë për ushqim, e cila do t'ju llogaritet në paga.
Kryetari i SASHK-ut Dojçin Cvetanovski tha se prej nesër normalizohet puna nëpër të gjitha institucionet që ishin në grevë. "Kjo do të thotë punë normale në çerdhe, mësim i rregulltë në shkollat fillore dhe të mesme dhe punë normale nëpër të gjitha entet e kulturës", tha Cvetanovski.
Ministri i Arsimit Pero Stojanovski tha se me Sindikatën kishin nënshkruar marrëveshjet kolektive më të mira që janë arritur deri tani për arsimin. "këto marrëveshje do të jenë shembull, si dhe në çfarë mënyrë duhet të përgatiten marrëveshjet kolektive", theksoi ministri Stojanovski.