Notimi në test edhe ne SHF "NURI MAZARI'-Dollogozhde

Byroja për Zhvillimin e Arsimit (BZHA) edhe ne SHF "Nuri Mazari'ka prezantuar materialin për standardet e vlerësimit të nxënësve.
Sipas standardeve të vlerësimit që ka përcaktuar BZHA në të gjitha lëndët mësimore nga klasa e tretë deri ne te tetë fillore do të bëhen vlerësimet e notimit nga 1 deri më 10 qershor.
Këshilltari i BZHA në Strugë, Bashkim Mislimi, thotë se në shkollat e Komunës së Strugës ka përfunduar prezantimi i standardeve para arsimtarëve, ndërkaq ai vlerëson se kjo bëhet për të informuar arsimtarët për testimin që i pret të gjithë ata. Përmes testimit që do të mbahet, do të vlerësohet objektiviteti i arsimtarëve në notim.
Rezultatet e testimit do të publikohen, ndërkaq në bazë të tyre parashihen edhe shpërblime dhe dënime. Nëse nota e arsimtarit ndryshon për më shumë se dy nota nga ajo që nxënësit do të marrin në testimin që do të bëhet në fillim të qershorit nga ana e BZHA arsimtari mund të ndëshkohet me 10 për qind nga paga mujore për një vit. Ndërkaq, për vlerësimin real ku do të përputhet ai vlerësim me notimin e testimit atëherë ai arsimtar do të shpërblehet me 15 për qind shtesë të të ardhurave mujore për një vit.
Vlerësimi përmes testimit do të përfshijë të gjithë arsimtarët individualisht.
Testimi i paralajmëruar për vlerësimin e notimit ka ndikuar që jo vetëm arsimtarët, por edhe nxënësit ta shohin ndryshe vlerësimin dhe nota mos shihet më si "mollë sherri" mes arsimtarit dhe nxënësit.
(Shpend Vinca "Lajm")